عەدنان كەریم بۆ سڤیل: هەندێكجار ئەوەندە بەقووڵی گوێم بۆ عەلی مەردان گرتووە گریاوم

ئازار 27 بڵاوکراوەتەوە لەلایەن  خوێندراوەتەوە 1864 جار
Rate this item
(0 votes)

 

هەستی من بە حوزن تێمەگەن

دەتوانم سیدی (خاتوون)بدەم بەئەوروپییەك و پێی بڵێم ئەوە میوزیكی وڵاتەكەی‌ منە

هەردوو كوڕەكەم گیتارژەنن

دژی كۆپیكردنەوە و لاساییكردنەوەم لە كاری هونەریدا

نازی كچەكەم جیاوازترە

 

ئەو یەكێكە لەو هونەرمەندانەی حەز لە دیمانەكردن ناكات، بەڵام كاتێك قسە دەكات، بۆچوونی لەسەر زۆربەی بوارەكانی هونەر هەیە. لەگەڵ ئێمەش وابوو، سەرەتا نەیدەویست دیمانە بكات، تەنها وتی "وا قاوەیەك بەیەكەوە دەخۆینەوە، بۆخۆمان قسەدەكەین"؟ دواتر رازیبوو قسەمان بۆ بكات. لەو دیمانەیەدا باسی كۆمەڵێك بابەتی هونەریی و بابەتی تایبەت بەخۆی كردووە.

پرسیارێك هەیە خەڵكیش زۆر دەیكەن، بۆ هەمیشە حوزنێك لەدەنگی عەدنان كەریمدا هەستی پێدەكرێت؟
عەدنان كەریم: باشە بۆ ئەو هەستە بەحوزن تێدەگەن؟ مەرج نییە حوزن بێت، رەنگبێت هۆكارەكەی‌ ئەوە بێت، كە من هەمیشە خۆم لەدونیای خەیاڵدا دەژیم. لەژیانمدا هەمیشە بەدوای ئارامی و هێمنیدا دەگەڕێم، بەدوای شتێكدا دەگەڕێم كە رۆحم شادبكات. پێم خۆشە لەگۆرانییەكانمدا هێمنییەك هەبێت، بۆیە ئەوە حوزن نییە، دەتوانین پێی بڵێین (ئارامی)، ئەگەر گۆرانییەكانی من حوزن ببەخشن، ئەی‌ بۆ خەڵكی بەرەوپیری دێن؟
عەدنان كەریم لەگەڵ خۆیدا زیاتر چ گۆرانییەك دەڵێتەوە، مەبەستم تەنیا گۆرانییەكانی خۆت نییە، بەڵكو بەگشتی؟
عەدنان كەریم: هەر گۆرانییەك ئارامبەخش بێت دەیڵێمەوە، ئەمەش بەپێی باری دەروونی خۆم دەگۆڕێت، وابەستە نیم بەیەك گۆرانی، هەندێكجار گۆرانی گۆرانیبێژانی دیكەش دەڵێمەوە، بەڵام هەروەكو وتم دەبێت لەگەڵ باری دەروونی خۆم بگونجێت.
ناوی منداڵەكانت هونەریین، ئەی‌ ئەوان پەیوەندییان لەگەڵ هونەردا چۆنە؟
عەدنان كەریم: هەر سێ منداڵەكەم (تابلۆ و لاوك و رێبەند) نێوانیان لەگەڵ هونەر باشە، هەردوو كوڕەكەم گیتار دەژەنن، بۆ هەر گەشتێكیش بڕۆن گیتارەكانیشیان دەبەن، هەمیشە ئارەزوو دەكەن میوزیكبژەنن. كوڕە گەورەكەم باشترین گیتاری بۆخۆی و برابچوكەكەشی كڕیوە. دواهەمین جار لاوكی كوڕم، كە هات بۆ سلێمانی پێم گوت كوا گیتارەكەت؟ گوتی (بەخوا بابە دڵم نەهات بیهێنمەوە لەگەڵ خۆم).
ئەی پەیوەندی خۆت و منداڵەكانت چۆنە؟
عەدنان كەریم: ئێمە نێوانمان زۆر خۆشە وەكو هاوڕێین، چونكە كاری خۆم لەسوید زیاتر پەروەردەیی بووە، بەڵام نایشارمەوە نازی كچەكەم زۆر جیاوازترە. كچەكەم قوتابیە لەزانكۆی ئەمریكی، شیعرێكی نووسیبوو بۆ ئەوەی‌ بكرێت بەمارشی ساڵانەی‌ ئەو زانكۆیە، پێشبــــــڕكێ ئەنجــــامــــدرابوو، شیعرەكەی‌ (تابلۆ)ی كچم بە یەكەم دەرچوو، هەر خۆشی ئاوازەكەی‌ بۆ دانابوو.
كۆلێژی هونەرەجوانەكان كە خۆشت ئێستا وانەی‌ تێدا دەڵێیتەوە، تەنانەت پەیمانگاكانیش، پێتوایە بوونەتە هۆكاری بەرزكردنەوەی‌ ئاستی هونەر لەكوردستان؟
عەدنان كەریم: تاوەكو ناوەندی ئەكادیمی هەبن بۆ هونەر، هونەر لەم وڵاتەدا بەرەو پێشەوە دەچێت، چونكە پەروەردەكردنی قوتابی و خوێندكار لەو ناوەندانە كاریگەری هەیە لەسەر جۆری هونەر، پێموایە ئەوانەی‌ ئەو بەشە تەواودەكەن دەبنە كەسانی ئەكادیمی، چونكە بەشێوەیەكی زانستی و بابەتی وانەكانی هونەر (موزیك و شێوەكاری و....هتد) دەخوێنن و مامۆستاكانیش زۆرینەیان توانای زانستییان باشە، بەتایبەت بەهۆی تواناسازییەوە. لەم چەند ساڵەدا زۆر لەمامۆستاكان لەدەرەوە خوێندوویانە و ئێستا لەو ناوەندانە وانە دەڵێنەوە، بۆیە كادر و مامۆستای باشمان هەن، ئەگەر لەساڵێكدا دە هونەرمەندی باش لەتەواوی بەشەكانی كۆلێژ یان پەیمانگاكان دەربچن، ئەوە سەرمایەیەكی باش دەبێت بۆ هونەری كوردی.
زۆرجار دەگوترێت لەهونەری كوردی داهێنان ناكرێت، رای ئێوە چییە؟
عەدنان كەریم: من رێزم هەیە بۆ هەموو بیروڕایەك، بەڵام ئەو كەسانەی‌ بەو شێوازە بیر دەكەنەوە، تەواو بەهەڵەدا چوون، گەلی كوردیش هونەر و ناسنامەی‌ خۆی هەیە، پێویستیش ناكات لەژێر كولتوری هیچ نەتەوەیەكی دیكە خۆی بشارێتەوە، دەبێت خۆی دەربخات زیاتر بەئەكادیمیانە و زانستییانە بڕواتە نێو هونەری مۆسیقای كوردی. بابگەڕێت و بزانێت هونەرمەندێك لەهەورامان و كرمانجی ژوورو یان لەگەرمیان، یان هەر ناوچەیەكی دیكەی‌ كوردستان چی گوتوە، لێكۆڵینەوەیان لەسەر بكرێت لەو دەنگ و ئاوازانەوە ئێمە دەتوانین بنەمایەك بۆ سەرچاوەی‌ مۆسیقای كوردی دابنێین و زیاتر گەشەی‌ پێ بدەین، ئەگەر من بمەوێت كۆپی مۆسیقای وڵاتێكی دیكە بكەم، واتە دەمەوێت لەژێر سێبەری ئەو نەتەوانە خۆم گەورە بكەم، كە هەرگیز گەورە نابم.
گوێ لەگۆرانی بیانی یان جیا لەكوردی دەگریت؟
عەدنان كەریم: بەڵێ گوێیان لێ دەگرم.
تۆ چەند گۆرانییەكی عەلی مەردانت گوتۆتەوە، هۆكارەكەی‌ بۆ چی دەگەڕێتەوە؟
عەدنان كەریم: بەڕای من بۆ سەردەمی خۆی عەلی مەردان ئەكادیمیترین گۆرانیبێژی كورد بووە، چونكە هونەرمەندێك بووە مەقامزان و میوزیكزان بووە، ئاستی دەنگی خۆی زانیوە لەهەموو پەردەكاندا گۆرانی گوتوە، هەستێكی بەرزی هەبووە، كاریگەری زۆری هەبووە، هەندێكجار ئەوەندە بەقووڵی گوێم بۆ گرتووە گریاوم، لای من پاشا و قوتابخانەی‌ گۆرانی كوردیە، هەرچەند گوێی لێبگریت زیاتر شتی لێ فێردەبێت .
پێتوایە شیعری كلاسیك یان شیعری نوێ زیاتر رووح بەبەر گۆرانیدا دەكات؟
عەدنان كەریم: من جیاوازی لەجۆری شیعرەكاندا ناكەم، ناوەڕۆكەكەی‌ بۆ من گرنگە، هەربۆیە جگە لەشیعرە كلاسیكییەكان، هەندێك شیعری حوڕیشم كردووە بەگۆرانی، بۆ نمونە شیعری سوارەی‌ ئیلخانی زادەم كردووە بەگۆرانی، كە تەنانەت خوێندنەوەشی زۆر زەحمەت و گرانە.
لەشاعیرە كلاسیكەكان زیاتر جەخت دەكەیتە سەر كامیان و شیعرەكانی دەكەیتە گۆرانی؟
عەدنان كەریم: سەرەتا لەنالییەوە دەستم پێ كرد، زۆر سەرسامی بووم، دواتر كە زیاتر چوومە ناو هونەرەكەمەوە شیعری زۆرینەیانم كرد بەگۆرانی.
پێشتر دەگوترا سلێمانی پێشەنگە لەهونەردا، بەڵام ئێستا ئەو هەستە كاڵبۆتەوە، پێتوایە ململانێ سیاسییەكان كاریگەریان هەبووبێت لەسەر دۆخی هونەری؟
عەدنان كەریم: ململانێ سیاسییەكان تەواوی جومگەكانی ژیانی گرتۆتەوە، هونەریش بەدەر نییە لەم كاریگەرییانە، سیاسەت نەك تەنها لەشاری سلێمانی كاری كردبێتە سەر هونەر، بەڵكو ئەم دۆخە هەموو شارەكانی دیكەی‌ هەر چوار پارچەی‌ كوردستانیشی گرتۆتەوە.
تۆ دۆخی هونەری كوردی لەچ ئاستێكدا دەبینی؟
عەدنان كەریم: لەراستیدا دۆخەكەی‌ جێگیر نییە، دەگۆڕێت، هەندێك جار بەرزە، هەندێك جاریش نزمە، ناتوانرێت دەستنیشان بكرێت.
بۆ لێرە هونەرمەند تائێستا نەیتوانیوە بەهونەرەكەی بژی؟
عەدنان كەریم: هونەر نەبۆتە كولتور لەكوردستان و پێویستە سیاسەتێك لەسەرەوە پارێزگاری لەهونەر و هونەرمەندان بكات. لەهەموو دونیا هونەر تاجی سەری مرۆڤایەتییە، چونكە من تەماشا دەكەم گوێگر هەمیشە رێزیان لێگرتووم، لەمنداڵ تاوەكو گەورە، بەڵام ئەوە پێویستە لەلایەن دەسەڵاتەوە بەسیستەم رێكبخرێت.
بەبەراورد بەو گەنجانەی تەمەنی هونەریان كەمە، كاری كلیپت كەمە، بەتایبەت لەم چەند ساڵەی دواییدا، بۆ نمونە لەچەند ئەلبوومێكدا كە بڵاوتكردۆتەوە، كلیپ بۆ هیچ یەكێك لەگۆرانییەكان نەكراوە؟
عەدنان كەریم: ئەوە پەیوەستە بە تەمەنەوە، لەوانەیە ئەگەر منیش سەرەتای كاركردنم بووبێت ئارەزووم دەكرد بۆ هەر گۆرانییەكم چەند كلیپێكم بكردبایە، گەنج مافی خۆیانە خۆیان دەربخەن و كلیپ بكەن.
بیرۆكەی‌ كاركردنت لەگەڵ كامكان هی كێ بوو؟
عەدنان كەریم: كامكاران ناسنامەی‌ میوزیكی كوردن، نەك هەر لەكوردستان، بەڵكو لەسەر ئاستی جیهانیش، بۆیە من شانازی بەو كارانەمەوە دەكەم كە لەگەڵ ئەوان ئەنجاممداون. لەساڵی 1992 ئەو خەونەم هەبوو لەگەڵ كامكاران كارێكی هونەری بكەم، بۆم نەگونجا بەهۆی چونم بۆ هەندەران، دواتر تاوەكو لەو وڵاتە خۆم پێگەیاند، گەیشتە ساڵی 2005، پەیوەندیم بەهۆشەنگ كامكارەوە كرد، ئەو راستەوخۆ گوتی ئێستا گروپەكەمان خەریكی گۆرانی (نارێی)ی تۆین، بۆ كۆنسێرتێكی خۆمان، منیش بیرۆكەكەی‌ خۆم پێگوت، ئەو گوتی گۆرانییەكانی خۆتمان بۆ بنێرە كاری لەسەر دەكەین، ئەوەش بوو بەسەرەتایەك بۆ ئەنجامدانی سێ ئەلبووم بەناوەكانی (ئەمشەو، وەفایی، خاتوون) كە هەر یەكەیان جیاوازن لەیەكتر، بەڵام لەدوو بەرهەمی یەكەمم زیاتر ئاوازەكانی هی خۆمن، ئەوان كاریان لەسەر كردووە، پێموایە ئەم كارە هاوبەشانەشمان پێشوازییەكی باشی لێكرا، بۆ نمونە لەتاران سێ رۆژ كۆنسێرتمان ئەنجامدا، هەر رۆژەی‌ نزیكەی چوار هەزار كەس ئامادەبوون.
ئەی‌ لەداهاتوو بەنیازی كاریان لەگەڵ بكەیتەوە؟ 
عەدنان كەریم: ئەگەر بگونجێت بەدڵناییەوە دەیكەم.
سیدی (ئەمشەو و وەفایی) دەنگدانەوەی‌ زیاتریان هەبوو بەبەراورد لەگەڵ سیدی (خاتوون و بادەی‌ گوڵڕەنگ و گوڵی نازدار) ئەمە بۆچی دەگێڕێتەوە؟
عەدنان كەریم: ئێمە پێوەرێكی ئەوتۆمان نییە بۆ دەستنیشانكردنی ئاستی بەرهەمەكان، هەندێكجار فرۆشتن دەكرێتە پێوەر، یان تۆڕی كۆمەڵایەتی یوتیوب، كە پێشانیدەدات هەر گۆرانییەك چەندجار بینراوە. بەڵام بەگشتی لێكۆڵینەوەی‌ وردی دەوێت. من خۆم شانازی بەسیدی (خاتوون)ەوە دەكەم، چونكە دەتوانم بیدەم بەئەوروپییەك و پێی بڵێم ئەوە میوزیكی وڵاتەكەی‌ منە، لەسیدی (بادەی‌ گوڵ رەنگ)یش، كە رەنگە چەند سیدیەكی دیكەشی بەدواوە بێت، مەبەستم لێی ئەوەبووە، گەنجی كورد بەرهەمێكی هونەری هەبێت وەكو قوتابخانەیەك بتوانێت لێكۆڵینەوەی‌ لەسەر بكات.
بۆ ئەو بەشداربووانەی‌ لەبەرنامەكانی وەكو ستار ئەكادیمی و زە ڤۆیس و نمونەی‌ ئەو بەرنامانە كە دەردەچن دوای بەرنامەكە نابنە هونەرمەندێكی بەناوبانگ؟
عەدنان كەریم: بوون بەهونەرمەند كارێكی ئاسان نییە، زۆر سەختە، تەنها دەنگ خۆشی رۆڵ نابینێت، لەزۆر لەو بەرنامە ئەوروپی و ئەمریكیانە كەسانی زۆر دەنگخۆش دێن، بەڵام نابنە هونەرمەند، چونكە لەبوون بەهونەرمەند خوێندنەوە و ئەزموون و چونە قوڵایی ناو هونەر و عەشقێكی گەورە بۆ ئەو هونەرە رۆڵیان هەیە. بوونە هونەرمەند كاتی دەوێت، تەنها بە بەرنامەیەك كامڵ نابێت.
بۆچی ئەندامیەتی لیژنەی‌ هەڵسەنگاندنت لەو بەرنامانە رەتكردەوە؟
عەدنان كەریم: بەراستی توانا و تاقەتی ئەوەم نەماوە.
جیاوازی دەبینیت لەنێوان بەرنامەی‌ (زەڤۆیسی ئەمریكی و عەرەبی و خۆشترین دەنگی كوردی)؟
عەدنان كەریم: من دژی كۆپی كردنەوەم، ئەو بەرنامانە بۆ خۆی ئەمریكین دواتر گەیشتە وڵاتانی دیكە، بەڵام وڵاتانی رۆژهەڵات نەهاتن شتێكی جیاوازتر پێشكەش بكەن، ئێمە هەوڵ دەدەین وەكو وڵاتان بین، لاساییان دەكەینەوە و لەوانیش ناچین، دەبێـت هەوڵبدەین خۆمان بین.
پێتوایە ماوەی نێوان بڵاوكردنەوەی بەرهەمی هونەری، كار دەكاتە سەر گوێگر؟
عەدنان كەریم: نەخێر پێموانییە، بەرهەم دەكەوێتە سەر ئاست و توانای هونەرمەندەكە، ئەگەر كاتم هەبووایە ئارەزووم دەكرد ساڵی دوو ئەلبوومم هەبوایە، چونكە ئەوە كاری هونەرمەندە، كە گرنگی بەهونەرەكەی بدات و بەرهەم پێشكەش بكات.
هونەرمەند عەدنان كەریم لەچی كارێكی خۆی پەشیمانە؟
عەدنان كەریم: لەهیچ كارێكم پەشیمان نیم، هەركارێكم بۆ من ئەزموونیكی ژیانم بووە، هەر چیەك مرۆڤ دەیكات لەژیاندا ئەزموونێكە بۆ داهاتووی بەباش و خراپەوە.

چرۆ حوسێن بۆ سڤیل

 

 

بۆنەکان

ئامادەبووانى ئێستا 19 میوان لەسەرهێڵن

گوتار

خواردن

ڕۆژمێر

« August 2017 »
Mon Tue Wed Thu Fri Sat Sun
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      
05-11-2015
ئاگاداری ئه‌م گۆڕانكارییه‌ نوێیه‌ی فه‌یسبوك به‌
ئاگاداری ئه‌م گۆڕانكارییه‌ نوێیه‌ی فه‌یسبوك به‌

كۆمپانیای فه‌یسبوك له‌ماوه‌ی چه‌ند رۆژی كه‌می داهاتوودا گۆڕانكارییه‌ك له‌به‌ربڵاوترین تۆڕی كۆمه‌ڵایه‌تیدا ده‌كات.

درێژەی بابەت
12-08-2015
مردنی هاولاتیان بە هۆی دەست و خەتی پزیشكان بەردەوامە
مردنی هاولاتیان بە هۆی دەست و خەتی پزیشكان بەردەوامە

زانایان لە لێكۆڵینەوەیەك ئەوەیان خستەڕوو كە ساڵانە ژماریەكی زۆر لە خەڵكی بەهۆی ئەو ئەو نوسینانەوە دەمرن كە پزیشكەكان بە هەڵە دەرمان بۆ نەخۆشەكان دەنووسن.

درێژەی بابەت
12-04-2015
ئه‌وه‌ی له‌باره‌ی ئه‌ندامی نێرینه‌وه‌ نه‌تزانیوه‌
ئه‌وه‌ی له‌باره‌ی ئه‌ندامی نێرینه‌وه‌ نه‌تزانیوه‌

ئه‌ندامی نێرینه‌ی پیاوان كه‌ پێی ده‌وترێت چوك، یه‌كێكه‌ له‌هه‌ستیارترین ئه‌ندامه‌كانی له‌ش، ئه‌مانه‌ی خواره‌وه‌ چه‌ند زانیارییه‌كن سه‌باره‌ت به‌و ئه‌ندامه‌:

درێژەی بابەت
24-03-2015
دیاریكردنی ڕەگەزی كۆرپە چۆن ده‌بێ؟
دیاریكردنی ڕەگەزی كۆرپە چۆن ده‌بێ؟

بەهۆی پێشكەوتنی زانست و بەش و لقەكانی بەتایبەت لە بواری پزیشكی، دایكان و باوكان دەتوانن بە جێبەجێكردنی چەند بەرنامەیەكی تەندروستی ڕەگەزی كۆرپەكانیان دیاریبكەن،

درێژەی بابەت
22-03-2015
ئەو هۆكارانە چین كە دەبێتە هۆی سەر ئێشە لە كاتی سیكس
ئەو هۆكارانە چین كە دەبێتە هۆی سەر ئێشە لە كاتی سیكس

پزیشكان لە توێژینەوەیەكیاندا بۆیان دەركەوتووە، پیاوان لە كاتی سێكس كردنیاندا، یان لە دوای پەیوەندیی سێكسی، 3 تا 4 جار لە ئافرەتان زیاتر تووشی سەرئێشە دەبن.

درێژەی بابەت
01-03-2015
نه‌شته‌رگه‌ریی چاندنی سه‌ری مرۆڤ به‌ڕێوه‌یه‌
نه‌شته‌رگه‌ریی چاندنی سه‌ری مرۆڤ به‌ڕێوه‌یه‌

پزیشكی نه‌شته‌رگه‌ری ئیتاڵی سێرجیۆ كاناڤێرۆ رایگه‌یاند، ده‌كرێت له‌ماوه‌ی دوو ساڵی داهاتوودا نه‌شته‌رگه‌ریی چاندنی سه‌ری مرۆڤ ئه‌نجامبدرێت.

درێژەی بابەت
Homeدیمانەعەدنان كەریم بۆ سڤیل: هەندێكجار ئەوەندە بەقووڵی گوێم بۆ عەلی مەردان گرتووە گریاوم

هەمەڕەنک

هونەری

ئێمە لە فەیسبووک

Zo2 Framework Settings

Select one of sample color schemes

Google Font

Menu Font
Body Font
Heading Font

Body

Background Color
Text Color
Link Color
Background Image

Top Wrapper

Background Color
Modules Title
Text Color
Link Color
Background Image

Header Wrapper

Background Color
Modules Title
Text Color
Link Color
Background Image

Mainmenu Wrapper

Background Color
Modules Title
Text Color
Link Color
Background Image

Slider Wrapper

Background Color
Modules Title
Text Color
Link Color
Background Image

Scroller Wrapper

Background Color
Modules Title
Text Color
Link Color
Background Image

Mainframe Wrapper

Background Color
Modules Title
Text Color
Link Color
Background Image

Bottom Scroller Wrapper

Background Color
Modules Title
Text Color
Link Color
Background Image

Bottom Scroller Wrapper

Background Color
Modules Title
Text Color
Link Color
Background Image

Bottom Menu Wrapper

Background Color
Modules Title
Text Color
Link Color
Background Image

Bottom Wrapper

Background Color
Modules Title
Text Color
Link Color
Background Image
Background Color
Modules Title
Text Color
Link Color
Background Image